Este verán a rapazada conquistará o castelo: talleres, xogos e historia

 Este verán as pedras do Castelo de San Antón e do Castro de Elviña volverán contar historias, pero desta volta coas voces e risas dos máis pequenos. O Concello vén de anunciar un programa de actividades arqueolóxicas e lúdicas para os sábados de xullo e agosto, dirixidas a nenos e nenas con inquedanza histórica e espírito explorador.

Os obradoiros, que combinan historia, creatividade e moita diversión, teñen como obxectivo facilitar a conciliación familiar e, ao mesmo tempo, achegar o patrimonio da cidade á veciñanza máis nova. A cousa vai en serio: o prazo para reservar praza abre o mércores 25 de xuño ás 10:00 h, e coas prazas limitadiñas, haberá que estar á carreira como se dunha escavación se tratase.

🔹 Información básica para familias rabuñeiras:

• Horario: todos os sábados ás 12:00 h

• Duración: 1 hora e media

• Aforo: 20 nenos/as por taller (15 máis adultos nos familiares)

• Máximo de dúas actividades por neno/a

• Levar: roupa cómoda, gorra, crema solar e moita curiosidade

---

No Castelo de San Antón (Museo Arqueolóxico)

• 5 de xullo – ECOPRINT

Do Paleolítico á moda sostible: descubriremos como se tinguían os tecidos na antigüidade e remataremos facendo un pano con flores. Cousas de druídas versión castrexa.

• 12 de xullo – O ARTE DO REPUXADO

Exploraremos pezas brillantes e antigas para facer o noso propio deseño con esta técnica milenaria. Imos sair con xoias baixo o brazo (ou nun chaveiro).

• 26 de xullo – ROMPECABEZAS NO CASTELO

Xogos grupais e aventuras para descubrir os recunchos secretos do castelo. Historia e maxia mesturadas coma nun xogo de mesa.

• 2 de agosto – COPISTAS MEDIEVAIS

Caligrafía, letras iluminadas e un salto á Idade Media. Como se escribiría "rabuña" con pluma de ganso?

• 9 de agosto – XOGANDO Á ROMANA

Tres en raia, dados, tabas… xogos de antes que aínda molan hoxe. Ao final, cada quen levará o seu propio xogo a casa.

• 23 de agosto – PENSAR COAS MANS

A cerámica castrexa será protagonista nun taller onde a creatividade será tan importante como a historia. Cada quen fará a súa ola (ou o que lle saia).

• 30 de agosto – ARTISTAS OURIVES (familiar)

Obradoiro para facer un torque castrexo en familia. E ollo, que non é de ouro, pero case parece.

---

🛖 No Castro de Elviña

• 19 de xullo – O TESOURO DE ELVIÑA (familiar)

Unha auténtica xincana arqueolóxica polos segredos do castro, con xogos, pistas e historia ártabra en familia.

• 16 de agosto – ¡ARQUEOLOXÍA EN ACCIÓN!

Simulación dunha escavación para coñecer como traballan os arqueólogos. Logo, visita guiada polas estruturas do castro. Daqueles castros, estes rabuñadores.

---

O verán koruñés non se entende sen mar… e tampouco sen historia. Estes obradoiros no San Antón e en Elviña son unha oportunidade única para que os máis pequenos descubran a súa cidade xogando, creando e aprendendo. Porque Koruña non só se vive: tamén se escava.