Koruña en modo "Centrifugado": cando o temporal decide que o Nadal estorba

Se onte pensabas que o teu peiteado ía aguantar un paseo pola Mariña, é que non es de aquí ou tes moita fe. O pasado 18 e 19 de decembro, a nosa cidade deixou de ser "A Cidade onde ninguén é forasteiro" para ser "A Cidade onde todo sae voando".

Un temporal con rachas de 80 a 100 km/h e ondas que daban medo só con miralas dende a fiestra deixou Koruña feita un cadro. Aquí vai a crónica de dous días de "festa" atlántica.

Riazor e a duna que xogou a ser muralla

Empecemos pola heroína do día: A duna de Riazor. Esa montaña de area que montamos todos os anos (e que algúns critican ata que ven a auga chegar ás escaleiras do Hotel Riazor) cumpriu o seu papel de escudo ata o seu final. 

O forte vento deixou fotos como estas. Fotos de La Voz de Galicia. 

O mar, que se puxo bravo con crestas de ata 7 metros (un cuarto piso, vaia), zampouse parte do muro de area. Pero grazas a que as máquinas bulldozer fixeron un bo traballo en novembro, a auga non chegou a entrar no Paseo nin a inundar a estrada. Iso si, o Concello xa avisou: en canto pase o perigo, as máquinas volven a entrar para reconstruír o castelo antes de que o próximo temporal decida entrar a tomar o café ao Playa.

O mar chegou a elevarse sete metros formando muros de auga.
Foto de La Voz de Galicia

O Nadal, polos aires (literalmente)

Parece que ao vento non lle gustaba moito a decoración deste ano. Na rúa Juan Flórez, o adorno vexetal da fachada de Zara amenceu arrancado, coma se o temporal quixese facer as súas propias rebais.

Pero o máis espectacular foi en María Pita. O noso flamante "poboado navideño" estilo europeo estivo a piques de converterse nun poboado voador. Varios telladiños saíron disparados e tiveron que ir os bombeiros —os heroes sen capa destes días— a facer de "carpinteiros de urxencia" para que o mercado non acabase na Pescadería.

Contedores con ansias de liberdade

O deporte nacional destes días foi "devolver o contedor ao seu sitio". Na Avenida de Fisterra, os veciños tiveron que facer de guardiáns do tráfico cando os depósitos de lixo decidiron invadir os carris.

Contedor atado a un árbol nos Castros. Foto de La Voz de Galicia. 

Pero o premio á enxeñaría popular lévao Os Castros: no mirador, a alguén non se lle ocorreu outra cousa que atar un contedor a unha árbore. Non sabemos se foi polo medo a que fose de viaxe ao porto ou por puro instinto de supervivencia, pero a imaxe xa é historia da nosa rabuña.

Bombeiros sen descanso

Mentres ti estabas na casa con mantita e Netflix, os bombeiros non pararon:

• Retirada de obstáculos en Emilio González López e A Sardiñeira.

• Saneado de tellados en San José.

• E a operación máis delicada: rescatar unha persiana en Antonio Viñes que ameazaba con caerlle na cabeza a algún incauto dende un segundo piso.

 A nosa rabuña

Está moi ben o das luces e as dunas, pero o temporal recordounos que aquí mandan o mar e o vento. Máis de unha hora estivo cortado o tren Coruña-Ferrol porque unha árbore decidiu deitarse nas vías entre Betanzos e Pontedeume.

O aviso segue: mañá sábado vén alerta laranxa outra vez a partir das seis da tarde. Así que xa sabedes, coruñeses: os xardíns de Méndez Núñez precintados (por se as pólas queren xogar a ser dardos), o litoral nin pisalo e, se tedes un contedor cerca, botádelle un lazo, non vaia ser que amenza noutro barrio.