As Noites do Porto enchen Koruña de música, gastronomía e vida

 Chega a quinta edición das Noites do Porto e faino coa promesa de ser a máis ambiciosa ata o de agora. Desde este martes e durante nove xornadas, a cidade converterase nun enorme escenario con 14 directos, 10 sesións con Djs e selectores, unha exposición e 14 localizacións diferentes, sen esquecer a parte máis saborosa: unha hamburguesa e un guiso mariñeiro creados especialmente para a ocasión.

Organizado por MASGALICIA, co apoio do Concello da Coruña, a Xunta de Galicia, a Deputación e Estrella Galicia, o festival medra ano tras ano, apostando pola variedade estilística e polos concertos exclusivos. Do rock ao punk, pasando polo hip hop, o jazz, o flamenco, o soul, o indie pop ou o garage, todo terá cabida nun cartel que presume de nomes grandes e momentos únicos.

Un cartel cheo de sorpresas

Entre os cabezas de cartel destacan The Lemonheads, que pisan por primeira vez un escenario galego; Ana Curra, en data exclusiva; Israel Fernández; Sho-Hai; ou La Casa Azul, que celebra os seus 25 anos de carreira acompañada de Soleá Morente. Tamén figuran Michelle David, Deadletter, Yazz Ahmed, Jasmine Myra, os galegos Fantasmage, Moura e o estreo absoluto de Océano Eskizo, entre outros.

A lista complétase con artistas como Juligan (Love of Lesbian), The Gruesomes, e unha chea de Djs e intérpretes locais, nacionais e internacionais. Estes últimos darán vida á cápsula Noites nos Bares, coa música espallándose polos locais emblemáticos da cidade: do Bristol Bar, que celebra o seu 30 aniversario, ao Don Giorgio, O Patachim, Ummagumma, Os Tigres Rabiosos ou Rosmón Burger, onde ademais se poderán probar os pratos creados para a ocasión.

Escenarios para todos os gustos

O festival terá o seu gran punto de encontro na carpa en forma de iglú no Muelle de Batería, pero tamén ocupará o Teatro Colón e as salas máis recoñecidas da noite koruñesa: Jazz Filloa, Garufa Club, Mardi Gras, Playa Club e Inn Club.

Con esta variedade de espazos, Noites do Porto consegue mesturar o espírito urbano co toque máis íntimo dos bares e clubs de referencia, facendo da cidade enteira un auténtico festival.

Cultura, música e identidade

Cinco anos despois da súa primeira edición, Noites do Porto xa é un referente no calendario cultural koruñés. Non só por traer grandes nomes, senón por crear unha experiencia única que mestura música, gastronomía e identidade local. Porque aquí, cada concerto sabe a mar, cada sesión leva o selo da cidade, e cada noite é unha festa que fala o idioma da rúa.