A ciencia sae ás rúas de Koruña na G-Night

 Este venres a ciencia colle protagonismo en Koruña e Ferrol coa celebración da G-Night, a Noite Galega das Persoas Investigadoras, unha xornada que levará obradoiros, visitas guiadas e charlas divulgativas a distintos recunchos da cidade.

A iniciativa está organizada pola Unidade de Divulgación Científica da UDC en colaboración cos centros de investigación CICA, CITEEC, CITENI e CITIC, e ten como obxectivo achegar o traballo das investigadoras e investigadores á cidadanía, desde escolares ata público adulto.

Ciencia en directo pola mañá

As actividades abriranse xa pola mañá con propostas pensadas para o alumnado. Na Escola Técnica Superior de Náutica e Máquinas, en Riazor, amosarase o funcionamento dun buque a través dun simulador. Na Domus, o INIBIC desenvolverá tres obradoiros para escolares: Enxeñaría e ciencias da saúde, A aventura do sono e A vida celular das enfermidades.

O campus de Elviña tamén será escenario destacado, con visitas guiadas ao CITEEC de 12.00 a 13.30 horas e percorridos polo Laboratorio de Hidráulica, con demostracións no túnel de vento, a dársena de portos e costas e outros espazos técnicos. Ademais, o CITIC abrirá as portas para que escolares coñezan proxectos de intelixencia artificial, realidade virtual, realidade aumentada e robótica.

Obradoiros, charlas e ciencia para todos pola tarde

Xa pola tarde, entre as 18.00 e as 21.00 horas, a programación espállase por cinco espazos da cidade. O MUNCYT acollerá tres obradoiros divulgativos sobre a aplicación das ciencias na condición física, as consultas meteorolóxicas e proxectos de investigación en ciencia e tecnoloxía.

Na Dársena da Marina, fronte á Autoridade Portuaria, haberá obradoiros abertos para familias: observación de plancto e microorganismos, ensaios co vento sobre estruturas, probas médicas sinxelas para avaliar o estado das articulacións, e explicacións sobre técnicas de inmunoterapia e investigación ambiental.

Unha das novidades máis destacadas será a incorporación de charlas para público adulto, tamén a partir das 18.00 horas, con temas tan diversos como o exercicio terapéutico no dor pélvico crónico, a conduta autolesiva non suicida, o uso de sensores e intelixencia artificial para coidar o medio ambiente, os efectos da dieta e o cambio climático na nosa pegada hídrica, os riscos asociados á IA ou as solucións xeolóxicas sostibles para o planeta.

Ciencia con acento koruñés

A G-Night pretende consolidarse como unha cita fixa no calendario da cidade, un día no que a ciencia sae das aulas e laboratorios para conversar directamente coa cidadanía. Un xeito de demostrar que a investigación non é algo distante, senón unha ferramenta imprescindible para mellorar a saúde, o medio ambiente e a sociedade no seu conxunto.