Alerta en Riazor: a Borrasca Jairo colle a substitución de Ingrid con máis forza

 Koruña volve mirar ao mar con respecto (e algo de medo). Foron só tres días. Martes, mércores e xoves. Un pequeno paréntese no que Koruña puido baixar a garda, mirar ao mar sen tensión e facer ver que o inverno daba unha tregua. Pero durou pouco. Este venres, a cidade volve entrar en alerta vermella meteorolóxica, outra vez polos fenómenos costeiros máis adversos, deses que lembran quen manda realmente neste recuncho do Atlántico.

Parece que o ceo lle ten xenreira á Koruña esta semana. Se pensabas que co de onte xa cumpríramos, a Borrasca Jairo está a piques de entrar pola Torre de Hércules con ganas de demostrar quen manda aquí. Non é unha treboada máis; é unha "cicloxénese" das nosas, das que che obrigan a pechar as fiestras con cinta illante.

O Vento: Refachos de "voar o flequillo"

O peor de Jairo non vai ser a auga, senón o vento. Espéranse refachos de componente Oeste-Noroeste que poden superar os 110 km/h nas zonas máis expostas (Riazor, Adormideras e o alto de Santa Margarida).

• O perigo: Co solo xa empapado por Ingrid, as raíces das árbores están fofas. Moito ollo ao pasar por Méndez Núñez ou o Parque de Bens; hoxe as árbores teñen o equilibrio dun que sae do Orzán ás seis da mañá.

O Mar: Ondas de "máis de dous pisos"

A situación na costa vai ser de Alerta Vermella. Jairo trae unha mar de fondo espectacular. Ondas que poden acadar os 9 metros. Coa marea alta desta tarde (arredor das 18:30h), o mar vai querer saltar o muro e meterse a tomar un café na rúa real. A zona de Modesta Goicouría e o espigón da Coraza van ser zonas de guerra. ¡Nin se vos ocorra ir facer a foto para o Instagram ao muro, que o mar non ten amigos!

A Choiva: O "calabobos" de sempre, pero con mala idea

Non se esperan inundacións catastróficas, pero si unha choiva persistente e racheada que, axudada polo vento, vai facer que o paraugas sexa un obxecto inútil e perigoso. É o típico día de chuvasqueiro e botas de goma, ou de quedar na casa comentando a xogada en Koruña Rabuña.

Foto de El Ideal Gallego. 

Segundo a Aemet, o peor chegará a partir das catro da tarde do venres, cando se active o aviso máximo por ondas que poden acadar os nove metros de altura. Ata ese momento, desde a medianoite, o aviso xa será laranxa, con previsión de ondas de ata oito metros. A alerta vermella manterase ata as oito da mañá do sábado. Unha noite longa para quen vive preto do mar… e tamén para os servizos de emerxencia.

Non é só cuestión de ondas. O vento tamén quere a súa parte. Toda a cidade e a área metropolitana estarán en alerta amarela por fortes rachas, que poden chegar aos 80 quilómetros por hora. Un cóctel que xa coñecemos ben nestas últimas semanas e que adoita deixar incidencias, chamadas aos Bombeiros e algunha que outra noite de sono interrompido.

O Orzán e o Matadoiro, engulidos outra vez

As imaxes xa non sorprenden, pero seguen impactando. O mar volvendo tragarse o Orzán e o Matadoiro, facendo desaparecer os areais baixo a auga como se nunca tivesen estado aí. Pasou esta semana, arredor das dez da mañá, coincidindo coa pleamar, e volverá pasar mentres o temporal siga golpeando a costa koruñesa.

O Matadoiro baixo o mar. Foto de El Ideal Gallego

Praia de Orzán. Foto de El Ideal Gallego. 

Nos últimos episodios de alerta vermella, a preocupación estivo especialmente posta en Riazor. O impacto continuado das borrascas acabou deixando moi tocada a duna protectora, ata o punto de que se produciron desbordamentos cara ao Paseo Marítimo. O Concello tivo que intervir esta mesma semana para reconstruíla, intentando gañar tempo e protección antes da chegada de novas borrascas.

Non era un medo infundado. A propia alcaldesa, Inés Rey, advertira días atrás do risco de que a auga puidese chegar incluso a Modesta Goicouría, ás portas da praza de Pontevedra. Finalmente non ocorreu, pero o aviso quedou aí: cando o mar quere, non entende de previsións optimistas.

Váter Fly, o urinario pantasma, volverá a voar

Nos Rosales estis días xa non fai falla mirar MeteoGalicia: cando hai alerta laranxa ou vermella, Váter Fly esperta. O famoso urinario pantasma, ese elemento a medio camiño entre o mitolóxico e o sanitario, volveu deixarse ver esta semana coincidindo coa chegada do no temporal.

Non o invocan meigas nin forzas do alén. Aquí nada de aquelarres. O seu é máis terrenal: vento forte, obra mal ancorada e mala hostia meteorolóxica. Cada vez que o tempo se pon bravo, o urinario colle folgos e desprázase polo entorno da praza Elíptica coma se tivese vontade propia.

Váter Fly camiño do mar

Nesta ocasión non causou estragos no tráfico nin chegou ata Manuel Azaña, pero os veciños con boa memoria —e certo gusto pola superstición— repararon nun detalle inquietante: a última vez que Váter Fly cobrou vida foi exactamente hai un ano, o 28 de xaneiro. Casualidade… ou xa estamos ante un ciclo ritual perfectamente establecido.

O Concello volve reconstruír a duna de Riazor tras o último temporal

O Concello de Koruña iniciou de novo os traballos de reparación da duna de Riazor, danada polas borrascas do mes de xaneiro e especialmente polo paso de Ingrid durante a fin de semana pasada. As obras arrancaron onte a través da Concellaría de Medio Ambiente, aproveitando a mellora momentánea da situación meteorolóxica, co paso da alerta vermella á amarela.

A duna volve a ponerse en pe. Foto de El Ideal Gallego. 

Para a reconstrución estase a empregar unha retroescavadora de trinta toneladas, encargada de volver montar e perfilar a estrutura de area que protexe o Paseo Marítimo. Segundo explicou a concelleira de Medio Ambiente, Yoya Neira, está previsto que os traballos queden rematados ao longo desta mesma semana, sempre que as condicións do tempo o permitan. Desde o Goberno municipal insisten en que a seguridade no paseo é unha prioridade.

Durante os días de peor tempo, e desde o pasado mércores, o Concello mantén tamén un retén dos servizos municipais de limpeza en Riazor, composto por un tractor e un camión cisterna. Este dispositivo encárgase de realizar arranxos puntuais e de retirar a area que poida acabar na beirarrúa ou na calzada como consecuencia do forte oleaxe.

A duna de Riazor, que supera os dous metros de altura no seu punto máis elevado, foi construída por primeira vez no ano 1995, despois dun forte temporal que chegou a derrubar a antiga balaustrada do Paseo Marítimo ao paso por este areal. Como é habitual, esta estrutura provisional manterase ata mediados do mes de maio, coincidindo co remate da tempada de temporais máis duros na costa koruñesa.

Peches, precaucións e unha rutina que xa é demasiado habitual

Ante este novo episodio, o Concello volveu tomar medidas coñecidas: parques, xardíns e praias pechadas, tanto o xoves como o venres. Un protocolo que xa forma parte da rutina deste inverno, no que Koruña leva semanas practicamente encadeando avisos amarelos, laranxas e vermellos sen apenas descanso.

O máis chamativo é que xa case non falamos de temporal excepcional, senón dunha normalidade perigosa, dunha sucesión de borrascas que non dá tempo a esquecer cando xa está chegando a seguinte. O mar entra, retírase, volve entrar… e cada vez deixa algo tocado polo camiño.

Koruña, cidade feita a carón do océano, sabe convivir con isto. Pero tamén sabe que hai límites. Por iso, máis alá das fotos espectaculares e das ondas rompendo contra o Paseo, a mensaxe volve ser a mesma de sempre: prudencia. Porque o mar, cando se enfada, non perdoa despistes nin selfies.

O Consello da Rabuña

1. Coidado coas macetas: se tes plantas no balcón, méteas dentro ou hoxe o teu xeranio acaba en Oleiros sen pasar polo peaxe.

2. Riazor en observación: o Concello xa avisou que a zona do estadio estará valada. Non sexas curioso, que o vento hoxe ten moita forza e a cuberta xa está "tocada".

3. Andar con sentidiño: se podes evitar o Paseo Marítimo, mellor. O salitre non é bo para o coche, e as pedras que bota o mar teñen moi mala puntería.