Coruña Vadis: A conquista de Madrid (con permiso de Roma e do loito)

Koruña non está ao "oeste do noroeste"; onte á noite, Koruña foi o centro de Madrid. Nas Naves de Matadero (un nome que, como ben dixo Touriñán, parece posto en honra á nosa praia), reuniuse a "crème de la crème" da cultura e a gastronomía herculina para abrir boca antes de Fitur 2026. Pero non foi unha noite calquera: o acto comezou cun minuto de silencio polas vítimas do accidente de tren en Córdoba, un recordo necesario que marcou o ton dun evento que soubo equilibrar a dor coa posta en valor do noso.

Presentación en Fitur 2026 de Koruña

Touriñán e Lucía Veiga: ¿Quen é máis coruñés?

A parella de presentadores puxo a nota de retranca. Entre bromas sobre quen era máis da cidade, Touriñán soltou esa verdade que todos sabemos: "Aos que somos do extrarradio tamén nos gusta dicir que somos da Koruña". Porque na Coruña ninguén é forastero, e menos se levas por bandeira o "vivir na Coruña que bonito é".

Non faltaron os clásicos: BiciCoruña, o Paseo Marítimo e, como non, o Dépor. Lucía dicía que todo na Coruña é bonito, ao que Touri retrucou: "Bueno, o Dépor é bonito depende do ano". ¡Retranca pura!

O Eclipse: "Aquí imos apagar as luces a o grande"

O gran protagonista turístico do ano non é un monumento, é o ceo. O eclipse solar total do 12 de agosto será o evento do século (non víamos un igual desde 1905). Mentres noutras cidades galegas presumen de encender luces, Touriñán presumiu de que na Coruña imos apagar o sol a o grande. O Concello xa ten unha comisión especial para este evento que atraerá a miles de turistas científicos e curiosos de todo o mundo.

Se onte falabamos da gastronomía en Madrid, hoxe Fitur confirmou o que todos sospeitabamos: o 12 de agosto de 2026 non vai caber un alfinete na Coruña. Baixo o lema "A Coruña, Ciudad Eclipse", o Consorcio de Turismo presentou unha estratexia que nos sitúa como o mellor escenario de Europa para ver como o sol desaparece en plenas festas de María Pita.

Un observatorio xigante: do Portiño ao San Pedro

Non fará falta ir lonxe para gozar do evento. O Concello vai habilitar puntos de observación por toda a cidade:

• Balcóns naturais: O Portiño, o Parque de Bens e o Monte de San Pedro serán os "palcos vips".

• Banda sonora espacial: mentres o sol se apaga, a Banda Municipal tocará BSO de películas espaciais e Los Satélites porán a nota verbeneira (pero con temática astronómica) para que o eclipse nos colla bailando.

• Campaña "Antón Lezcano": verás a Torre de Hércules eclipsada en todos os mercados e comercios, cunha imaxe espectacular deseñada polo artista coruñés.

Cruceiros, Congresos e prezos de loucura

O eclipse xa non é só cousa de científicos (que tamén, con dous grandes congresos internacionais esa semana), é un fenómeno de masas:

• 5 cruceiros atracarán ese mesmo día no peirao para non perder o momento.

• Ocupación ao límite: Hai hoteis onde a noite xa se está pagando a 1.300 euros. Unha tolemia que reflicte que o mundo enteiro quere estar aquí.

• Turismo estranxeiro: En 2025 xa subiu un 20%, e este ano o golaveraxe vai ser de récord.

Koruña "de cine" e o rugido do Coliseum

Pero non todo vai ser mirar ao ceo. Koruña xógase entrar na Rede de Cidades Creativas da Unesco grazas ao potencial do audiovisual na Cidade das TIC. Somos un ecosistema de cine, e o novo "Koruña Estudio Inmersivo" é a proba de que xogamos noutra liga.

E para os que prefiren o ruído de sala:

• 23 artistas confirmados para o Coliseum este ano (con 26 actuacións en total).

• A maioría dos concertos serán en exclusiva para Galicia, o que asegura que o multiusos siga pulverizando récords de asistencia (máis de 360.000 persoas en 2025).

"Koruña Cociña": Unha viaxe polo padal

Se algo levamos a Madrid que non admite discusión, é a comida. O grupo Koruña Cociña deu un recital que nos fixo salivar a todos:

• Gorka Rodríguez (Pulpeira de Melide) co clásico polbo á feira.

• Koke Trigo (A Espiga) coas fabas de Lourenzá e cachucha.

• José Mago (O Lagar da Estrela) coa súa tosta de sardiña afumada.

• E para os máis modernos: as manitas con cigalas de Pablo Gallego ou a carrilleira de Pracer. O peche foi unha "C" xigante de Coruña feita sobremesa por Pablo Morales, demostrando que a nosa marca tamén se come.

Koruña Vadis: Agardando o venres

A estrea do curto promocional, 'Coruña Vadis', dirixido por Javier Veiga e onde viaxamos ao Imperio Romano, terá que agardar ao venres por respecto ao loito oficial. A Coruña chegará a Roma, pero farao coa solemnidade que esixe o momento.