Balance de Harry na Coruña: 90 incidencias e a costa en "zona de guerra"

A borrasca Harry non pasou de largo. O Centro Integrado de Atención a Emerxencias de Galicia (112) confirmou o que xa sospeitabamos: a provincia da Koruña foi a "zona cero" do temporal, rexistrando 90 das 245 incidencias totais de Galicia. Mentres o reloxo avanzaba cara ás 21:00h —momento no que se activou a perigosa alerta vermella—, os equipos de emerxencia non deron abasto.

Árbores caídas e estradas cortadas

O vento foi o gran protagonista da xornada antes de que o mar tomara o relevo. A maioría das intervencións estiveron relacionadas coa caída de árbores e pólas (máis de cen en toda Galicia) e restos de accidentes que dificultaron o tráfico en moitos puntos da bisbarra.

• Fallas eléctricas: 15 avisos por cables de luz e teléfono arrancados.

• Seguridade urbana: Ata 30 intervencións para apuntalar muros e asegurar fachadas que ameazaban con desprenderse sobre a beirarrúa.

Riazor e Orzán: "¡Moi perigoso!"

O Concello mantivo o peche total de parques, xardíns e o acceso ás praias. A mensaxe da AEMET nas redes sociais foi clara e directa: "¡Moi perigoso achegarse a praias, cantís e espigóns!". Coas ondas acadando os 9 metros de altura e ventos de forza 7, calquera imprudencia podía ser fatal. Salvamento Marítimo tamén tivo que facer un chamamento urxente para suspender calquera saída de barcos no litoral koruñés.

La Voz de Gaicia.

Pero se hai algo que incendiou as redes sociais e as conversas nos bares da Coruña onte, foi a imaxe de varios surfistas metidos na auga no medio do temporal. Mentres o común dos mortais buscaba refuxio, estes "homes e mulleres de ferro" aproveitaron a forza de Harry para coller ondas que poucos se atreverían sequera a mirar de preto.

A polémica está servida:

• Os que critican: moitos veciños e os propios servizos de emerxencia consideran que é unha imprudencia temeraria. Cun aviso vermello e ondas de ata 9 metros, calquera problema na auga obriga a despregar un helicóptero ou unha lancha de Salvamento, poñendo en risco a vida dos rescatadores.

• Os que defenden: os máis veteranos do surf coruñés argumentan que son profesionais que coñecen o mar "coma a palma da man", que saben por onde saír e que o Orzán, en días así, é o único lugar onde poden atopar o nivel que buscan.