Ingrid entrou pola porta grande en Koruña: noite de granizo, tronos e unha cidade en alerta permanente

Granizo, vento, oleaxe, raios e tronos. Pouco faltou para completar o bingo meteorolóxico. A borrasca Ingrid decidiu presentarse en Koruña a última hora do xoves con todo o seu repertorio, sen medias tintas, e deixou unha noite longa e moi pouco tranquila para miles de koruños que miraban pola ventá como as rúas se cubrían de branco e o ceo se iluminaba a golpes de raio.

A partir das nove da noite do xoves, o granizo caeu con forza por primeira vez, sorprendendo a máis dun. Non sería a última: repetiría tamén pola mañá do vernes, arredor das oito. Entre medias, unha sucesión de tormentas eléctricas que converteron a madrugada nun espectáculo tan impresionante como incómodo. A Axencia Estatal de Meteoroloxía detectou uns 700 raios en todo o noroeste galego, e estímase que ata 80 puideron caer na área metropolitana da Koruña. Un deles, especialmente potente, retumbou sobre a cidade arredor da unha e media da madrugada e provocou un apagón no centro, deixando fóra de servizo o sistema semafórico durante preto de dúas horas. Mesmo a Torre de Hércules quedou ás escuras durante parte da noite, como parte do centro da cidade. 

Segundo explicou Francisco Infante, delegado da Aemet en Galicia, o sucedido entra dentro do previsible cando se fala dun “tren de borrascas” como Ingrid, con tormentas que se suceden unha tras outra. Ademais do aparato eléctrico e do granizo, o vento fixo tamén acto de presenza con rachas moi serias: no observatorio rexistrouse unha de 96 quilómetros por hora, suficiente para causar danos visibles. Un dos máis chamativos foi o levantamento parcial do teito do aparcadoiro situado xunto ao Chuac.

Forte oleaxe petando en Orzán Foto de El Ideal Gallego. 

A muralla de area de Riazor,  vista de fronte, 
non puido conter as grandes ondas do temporal. Foto de El Ideal Gallego

O granizo deixou as rúas cubertas na maña do vernes. Foto de El Ideal Gallego

Na tarde do vernes, o forte oleaxe non chegou a ser tan forte como para que o mar chegara a terra, ca duna xa fora de xogo. 

A xente inmortalizando o momento do paso
do temporal sen medo a que una onda acabara con suas vidas. Foto de El Ideal Gallego. 

O Estadio de Riazor resiste outro temporal mais neste duro inverno. Unha pena que as reformas o separaran do oceáno que podiase ver desde su interior nos seus inicios. Foto del Ideal Gallego.  

Imáxenes do paso da borrasca Ingrid (fotos de El Ideal Gallego). 

Fachadas, chemineas e farolas: os Bombeiros en acción

O vento estivo detrás da maior parte das intervencións dos Bombeiros durante a alerta vermella. Houbo que actuar en saneamentos de fachadas danadas en rúas como Gerión, Manuel Murguía ou a estrada dos Fuertes. Na avenida dos Mallos, unha claraboia solta obrigou a intervir a primeira hora da tarde, e no Paseo Marítimo retirouse unha farola que ameazaba con caer desde oito metros de altura. Na rúa Federico Tapia, unha cheminea tamén supoñía un risco claro de desprendemento.

Durante todo o día, a Xunta anunciou o peche dos centros escolares, mentres o Concello prohibía actividades deportivas ao aire libre e pechaba parques e xardíns. A cidade estaba en modo precaución total, especialmente polo que podía pasar co mar.

O mar ameazou… pero quedou a medio camiño

Desde o atril, a alcaldesa Inés Rey advertía do perigo que ofrecía o océano pola tarde, sobre todo pola desaparición da duna de contención do Orzán. A combinación de pleamar e forte oleaxe facía temer que a auga puidese chegar ata Modesta Goicouría ou mesmo á praza de Pontevedra. De feito, suspendéronse as clases no Eusebio da Guarda, situado no Paseo Marítimo, e precintáronse os accesos ás praias e á Coraza.

A alerta vermella rematou ás tres da tarde, pero continuaba o aviso laranxa, coa pleamar prevista arredor das sete. A alcaldesa insistía en que o vento podía xogar unha mala pasada se cambiaba de dirección e pedía prudencia máxima. Tamén deixou claro que saltarse as restricións tería consecuencias: “Ao que se o salte, multa”.

Finalmente, o vento afrouxou no momento clave e as peores previsións non se cumpriron. As ondas, duns seis metros, quedaron por debaixo do esperado e apenas salpicaron o Paseo Marítimo. Non foi necesario cortar o tráfico, aínda que o dispositivo estaba preparado. Iso si, non faltaron os curiosos que, pese ás advertencias, se achegaron a facer fotos do mar embravecido, poñendo o selfie por diante da seguridade.

Semáforos apagados e unha cidade en vixilancia constante

O temporal tamén deixou pegada na rede semafórica. Segundo explicou Inés Rey, Koruña estivo sen semáforos ata as cinco da mañá, e aínda pola mañá persistían problemas nalgúns cruces importantes como Juana de Vega, Fonseca ou Durán Loriga.

A borrasca Ingrid non se despediu de golpe. A alerta vermella volverá activarse e, segundo Aemet, a cidade entrará e sairá do nivel máximo de emerxencia durante toda a fin de semana. Seguirá facendo frío, con chuvias e episodios puntuais de granizo, aínda que con menor intensidade ca na noite do xoves ao venres.

Mentres tanto, a neve deixou en segundo plano o protagonismo do litoral, con varios concellos da comarca en alerta amarela por acumulacións a partir dos 400 ou 500 metros. En puntos como Curtis xa se puideron ver campos tinguidos de branco, anticipo do que pode vir.

Pouco máis pode facer a cidade que abrigarse, extremar as precaucións e manterse afastada do mar. Ingrid chegou con forza e deixou claro que este inverno non pensa pasar desapercibido. En Koruña, do vermello ao laranxa e do laranxa ao amarelo, a alerta xa é case parte da paisaxe diaria.