Coruña de Aventura 2026: 16.000 escolares redescobren a nosa cidade

 O Concello de Koruña vén de poñer en marcha unha nova edición de 'Coruña de Aventura', un programa que desde os anos noventa se consolidou como a gran ferramenta para que o alumnado saia das aulas e se recoñeza no seu propio territorio. Nesta ocasión, a iniciativa contará coa participación récord de 15.963 estudantes procedentes de 82 centros educativos, un dato que reafirma o éxito dunha proposta que suma xa máis de tres décadas de vida. O carácter integrador do proxecto reflíctese en que, dos centros participantes, 70 pertencen ao municipio coruñés e 12 a concellos da comarca, consolidando así a visión metropolitana que defende o goberno local.

Ata o vindeiro mes de xuño, rapaces e rapazas de todas as etapas (desde as Escolas Infantís ata Secundaria) terán a oportunidade de achegarse de xeito práctico ao patrimonio cultural, institucional e empresarial de Koruña. Segundo destacou o concelleiro de Educación, Juan Ignacio Borrego, o obxectivo é que os mozos "descubran a súa cidade e se recoñezan nela", reforzando un aprendizaxe activo que vai máis alá dos libros de texto. Para garantir que ningún alumno quede atrás por cuestións económicas ou loxísticas, o Concello ofrece transporte escolar gratuíto a todos os centros públicos (CEIP, IES e EIM) da cidade.

Domus. Concello de Koruña

As actividades, coordinadas coa Federación Provincial de ANPAs, inclúen visitas a espazos tan emblemáticos como os Museos Científicos (Domus, Aquarium ou Casa das Ciencias), o Castelo de San Antón ou a Casa Museo Picasso. Ademais, o programa pon o foco no tecido económico local, permitindo que os estudantes coñezan de primeira man o funcionamento de empresas e entidades singulares. A xestión de cada itinerario realízase a través dunha aplicación municipal específica que permite o seguimento e avaliación de cada visita, asegurando que 'Coruña de Aventura' siga sendo un motor de igualdade de oportunidades e un orgullo para a educación pública coruñesa.