San Amaro volve navegar en Monte Alto

 Este xoves 15, Koruña mira outra vez cara ao mar… pero non para ver chegar un petroleiro nin un cruceiro, senón para seguir a estela dunha das figuras máis fascinantes do imaxinario atlántico: San Amaro, o navegante.

Ás 20.00 horas, na biblioteca da Asociación Vecinal Atochas–Monte Alto, na rúa da Torre, celebrarase a conferencia “Amaro, o Santo Navegante que atopou a Illa Paraíso”, un encontro cultural dedicado ás lendas, relatos e historias que rodean a súa mítica viaxe ata a Illa do Paraíso.

Baixo un lema tan claro como necesario —“Non confundas a Mauro con Amaro navegante”—, a charla propón un percorrido polo universo simbólico que une Koruña e Lisboa a través do Atlántico, da tradición oral e das viaxes imposibles que, durante séculos, axudaron a explicar o mundo cando aínda non estaba todo nos mapas.

Non é unha conferencia só para eruditos nin para especialistas: é unha invitación a recuperar esas historias que flotan entre a relixión, a mitoloxía e a navegación, e que forman parte dese fondo común que tamén define ás cidades mariñeiras como a nosa.

Un plan perfecto para unha tarde de xoves en barrio, con cultura, memoria e océano de fondo. Porque en Koruña, mesmo cando falamos de santos, sempre acabamos falando de barcos, viaxes… e do mar.