Hoxe ás 14:00 horas, mentres moitos estaredes pedindo a segunda rolda de vermú, o Dépor xógase media vida en Zubieta ante a Real Sociedad B. O guión está claro: tras o tropezo do Castellón, unha vitoria branquiazul igualaría os puntos de ascenso directo. Pero ollo, que no Dépor nunca nada é fácil, e menos cando o adestrador decide levantar a alfombra antes de viaxar.
Hidalgo contra o mundo (e contra a "enerxía")
Antonio Hidalgo parece que non acaba de sentirse cómodo no traxe de técnico herculino. Tras gañar ao Eibar por un axustado 1-0, en vez de celebrar, decidiu tirarlle das orellas á afección (e de paso aos seus xogadores) pola "enerxía" de Riazor.
A rabuñada: ¡Ai, Antonio! Que a estas alturas aínda non saibas que en Koruña gañar non chega... Aquí esíxese vencer e convencer. Non é xusto, din algúns, pero é o que hai cando dirixes a un xigante. Hoxe en Zubieta ten unha oportunidade de ouro para que falen os goles e non as roldas de prensa. Debe gañar para volver a ter opcións para ocupar postos de ascenso directo.
David Mella: A "Bala de Teo" colle o temón
A mala noticia: Yeremay queda na casa. Sen o "10", o Dépor perde maxia, pero gaña un foguete. David Mella recupera o seu sitio natural, esa banda esquerda onde se fixo lenda nas categorías inferiores.
O reto: Mella ten que ser o referente. El foi o que mellor axudou a madurar a Yeremay no seu día, e hoxe ten que demostrar que, sen o seu "irmán maior" ao lado, el só pode descoser calquera defensa. Con Quagliata gardándolle as costas, agardamos ver a versión máis eléctrica do rapaz de Teo.
 |
| Pode ser o partido de Mella |
Informe "O Sanse 25-26", un filial con pel na cara
Se pensabas que hoxe o Dépor ía xogar contra uns nenos que só queren dar pases bonitos, estás moi equivocado, neno. O Sanse de Jon Ansotegi é o único filial no fútbol profesional español e, lonxe de ser o típico equipo de "toque-toque", é un auténtico óso de roer. Aquí tes o que nos imos atopar en Zubieta:
1. O Filial "Mala hostia": Cando a técnica se viste de guerra
Este Sanse rompe tódalas estatísticas que agardas dun segundo equipo. Ollo aos datos que manexan:
Os reis da leña: É o equipo de toda a Segunda que máis faltas fai (453 acumuladas). Para que te fagas unha idea, levan 27 máis que o Valladolid, que é o segundo.
Coleccionistas de cromos (amarelos): Con 80 tarxetas en 27 xornadas, ninguén ve máis cartóns que eles. Xogan ao límite.
O balón? Para ti: Son o segundo equipo con menos posesión da categoría (43,4%). Non necesitan a bola para gañar; agardan, morden e saen coma balas.
Córneres? Nin os cheiran: Son os que menos bota de toda a liga. Eles prefiren a pegada directa e a efectividade.
2. Gorka Carrera: O perigo ten 20 anos
A gran ameaza chámase Gorka Carrera. O rapaz está de explosión total:
Leva 11 goles, só un menos que Dubasin e catro por debaixo do Pichichi Arribas.
Xa debutou co primeiro equipo da Real e vén de meter tres dianas en febreiro.
Sen Yeremay no campo, o duelo de "killers" hoxe queda coxo, así que a nosa defensa terá que estar pegada a el como un chicle.
3. Jon Ansotegi: Un adestrador "ascensor"
Ansotegi é o home de moda. O seu decembro foi unha tolemia de montaña rusa:
Goleounos en Riazor (0-3) xusto antes de Nadal.
O presidente Aperribay chamouno para o primeiro equipo tras botar a Sergio Francisco.
Debutou gañando na Copa e empatando no Ciutat de Valencia, antes de que a Real fichara a Pellegrino Matarazzo e el volvera ao filial para seguir repartindo estopa.
4. O "Fortín" de Zubieta
Rematadas as obras para o fútbol profesional, o Sanse volveu a casa e sentoulle de marabilla. Aínda non perderon en Zubieta:
Empataron co Albacete e Las Palmas, e veñen de remontarlle ao Málaga (un rival directo noso) con dez xogadores tras a vermella a Gorosabel.
O propio Ansotegi avisa: "É unha oportunidade para xogar contra rivais grandes". Téñennos ganas, nenos.
"Quién es Quién" do Sanse 25-26
O Sanse de Jon Ansotegi xa non é aquel equipo tenro do principio de liga. Chegan con tres vitorias seguidas no peto e coa vantaxe de que Pellegrino Matarazzo (o técnico do primeiro equipo) devolveulle a todos os "nenos" para este duelo. Aquí tes quen é quen:
A portería: O xigante sub-21
Fraga (22 anos): O porteiro preferido de Ansotegi. Leva todos os minutos xogados (1.980) e foi gañando unha confianza brutal. Foi internacional sub-21 e hoxe haberá que suar moito para batelo.
A defensa: Onde podemos facer sangue
Garro (20 anos): Ocupa o punto débil do equipo: o lateral dereito. Está xogando por sanción de Dadie e ten ficha do equipo C. É aquí, neno, onde Mella ten que facer un estropicio. É a zona onde máis sofre o Sanse.
 |
| Garro e o punto débil |
Kita (20 anos): Central xaponés poderoso e cunha saída de balón exquisita. Está aproveitando a súa cesión ao máximo. Se Beitia non se recupera, el será o xefe da zaga.
Unax Aio (19 anos): O novo da clase. Gañou o posto tras a saída de Peru á Cultural. Moita proxección pero pouca experiencia en batallas de alto voltaxe.
Balda (23 anos): Ollo con este. Xa nos vacinou en Riazor e acaba de renovar. Ten un "guante" no pé para os centros e as faltas. O seu golpeo dende fóra da área é un perigo real.
A sala de máquinas: Talento e control
Carbonell (20 anos): Un pivote clásico, de toque, que marca os tempos do partido. O seu único "pero" é o físico, aínda algo frouxo. Ollo por se volve Gorosabel para darlle máis músculo á medular.
Aguirre (18 anos): O "benxamín" que subiu dende o C para tapar o burato das lesións e quedou por méritos propios. Gañou moita forza nas últimas xornadas.
Mikel Rodríguez (23 anos): O heroe do ascenso a Segunda. Ten prohibido debutar co primeiro equipo (polo tema da ficha P), así que está centrado 100% no filial. Renovado ata 2029, é o motor do equipo.
O ataque: Velocidade e gol
Ochieng (22 anos): A "bestia" ao espazo. Cun pasado de superación (a súa familia en Kenia pagoulle a vinda a España con colectas), agora é un fixo. Vén de meter un golazo en Cádiz e presiona como un animal.
 |
| Ochieng |
Dani Díaz (19 anos): O "mesiánico" do equipo. Moitísima calidade pero pouco fuelle (aguanta uns 70 minutos). Se non xoga el, entrará Astiazarán, que traballa moito máis pero ten menos maxia.
Gorka Carrera (20 anos): O home de moda. 11 goles que valen 16 puntos. É candidato a mellor xogador do mes de febreiro. Ansotegi non o quita nin que o maten porque sabe que, no momento menos pensado, manda o balón á rede.
 |
| Carrera, un perigro para o Dépor. |
A Nota do Licor Café (O consello técnico do bar)
"Mira, neno, ese Sanse é un 'lobo con pel de cordeiro'. Din que son un filial, pero pegan máis que un sogro ao que lle pides cartos prestados. Que sexan os que menos balón teñen e máis faltas fan dinos que hoxe imos ver un partido de trincheiras. 453 faltas! Iso son case 17 por partido... o colexiado vai acabar co brazo canso de sacar amarelas.
Hoxe Hidalgo ten que xogar co coitelo entre os dentes. Se nos poñemos a facer o 'brasileiro', vánnos levar por diante. A clave: que Mella aproveite que eles non queren a bola para romperlles as liñas antes de que nos fagan a falta táctica. ¡Forza Dépor e poñede as espilleiras de titanio, que hoxe en Zubieta vai haber baile do bo!"
O resumo é claro: hai que atacar por onde está Garro. Ese rapaz é o elo máis frouxo da cadea e David Mella ten que comelo con patacas. Por outra banda, hai que ter a Ochieng e a Carrera ben amarrados, que eses dous corren máis que a borrasca Pedro cando ve un paraugas aberto.
O Sanse está no seu mellor momento, pero nós somos o Dépor e hoxe Zubieta ten que saber o que é a presión herculina. ¡Que non nos maree Carbonell co toque e que Mella lle faga un nó ao lateral! ¡Forza Dépor!".
Cómo xogar para gañar
Para gañar hoxe en Zubieta, o Dépor non pode ir de "señorito". Ten que poñer o mono de traballo porque o Sanse de Ansotegi é unha trampa para ratos. Aquí tes a estratexia que debería asinar Hidalgo no seu encerado se quere saír a ombros:
1. Explotar a "Autoestrada Garro"
Como vimos no scouting, o mellor que poda pasar e que xoge o lateral dereito Garro, é o elo máis frouxo do Sanse. Ten ficha do equipo C e hoxe por verse as caras co noso mellor argumento: David Mella.
A estratexia: Mella ten que buscar o un contra un dende o minuto 1. Se o encara con velocidade, Garro vai sufrir ou vai acabar facendo unha falta de amarela cedo. Hai que cargar o xogo por esa banda esquerda do Dépor para romper o sistema defensivo vasco.
2. Sobrevivir á "Choiva de Faltas"
O Sanse é o equipo que máis faltas fai (453!). A súa táctica é clara: se me superas, fágoche falta e corto o ritmo.
A estratexia: O Dépor ten que ser intelixente emocionalmente. Se Muresan (o árbitro) permite o contacto, non hai que desesperar. A clave é xogar a poucos toques para que non lles de tempo a chegar ao contacto. Se Soriano e Riki (ou quen estea arriba) soltan o balón rápido, o Sanse vai chegar tarde e as faltas serán en zonas perigosas para o seu porteiro, Fraga.
3. O control de Carbonell e Mikel Rodríguez
O Sanse quere que o partido sexa un caos de idas e voltas ou un monólogo seu se Carbonell colle o mando.
A estratexia: Riki e Mario Soriano teñen que facer unha presión asfixiante sobre Carbonell. Se el non marca os tempos, o Sanse vólvese un equipo precipitado. Hai que morder no centro do campo para que non poidan conectar cos seus perigos: Ochieng e Carrera.
4. Atar en curto a Gorka Carrera
Este rapaz non necesita o balón para facerche dano. Se a defensa lle deixan medio metro, vacuna.
A estratexia: Defensa de axudas constantes. Carrera móvese moi ben entre centrais; hai que estar pegado a el e, sobre todo, vixiar as vixilancias ofensivas cando o Dépor estea atacando. Se perdemos o balón, Carrera vai buscar a espalda dos nosos centrais como un lóstrego.
5. O balón parado: A nosa arma secreta
O Sanse bota moi poucos córneres e é un equipo ao que se lle pode facer dano na estratexia se o árbitro asubía moitas faltas preto da área.
Posibles Alineacións
O que din os números… e o que pide o corpo
Os antecedentes non axudan a relaxarse. A Real Sociedad B xa lle meteu man ao Dépor esta tempada cun contundente 0-3 en Riazor e chega a este partido no mellor momento do curso, con tres vitorias consecutivas e a sensación de equipo feito, incómodo e competitivo. Zubieta xa non é un campo amable.
A pesar diso, os mercados de apostas colocan ao Deportivo como lixeiro favorito. As cuotas sinalan que unha vitoria branquiazul é o resultado máis probable, por diante do empate e da vitoria local. Traducido: fóra da casa tamén se espera que o Dépor dea un paso adiante.
| Resultado | Cuota media aproximada |
|---|---|
| 1 (Victoria de la Real B) | ~3.10 |
| X (Empate) | ~3.20 |
| 2 ( Victoria del Dépor) | ~2.20 |
O contexto, con todo, invita á prudencia. Todo apunta a un partido pechado, con poucas ocasións e moita loita, onde cada detalle pode decidir o resultado. Un empate encaixa co momento dos dous equipos, pero tamén unha vitoria visitante pola mínima se o Dépor é capaz de ser serio atrás e aproveitar algunha das súas chegadas.
-Pronóstico razoable: partido curto, trabado, con poucos goles.
-Predición da casa: empate a un… ou un 0-1 sufrido para o Dépor.
Porque se algo parece claro é que en Zubieta non haberá alegrías fáciles. Se o Dépor quere seguir soñando, tocará traballar, sufrir e —esta vez si— convencer.
O árbitro tamén xoga: ollo co equipo arbitral en Zubieta
Nun partido coma este, tan cargado de tensión e importancia, o foco non vai estar só no balón. O apito tamén conta. E moito. O encargado de impartir xustiza en Zubieta será Sergiu Claudiu Muresan (colexio valencián), un colexiado pouco coñecido para o gran público, pero que xa deixou algunha pegada nesta categoría.
 |
| Sergiu Claudiu Muresan |
Muresan é un árbitro de perfil estrito, con tendencia a cortar o xogo e sen demasiado medo a mostrar cartolina. Nun contexto coma o que propón a Real Sociedad B —equipo intenso, físico e o que máis faltas comete da categoría— isto pode converterse nun factor decisivo. Se o listón está baixo, o partido pode romperse en mil interrupcións. Se está alto, haberá contacto e desgaste.
O perigo para o Dépor: se Muresan ten o día "cortador", vai ser imposible pillar ritmo. Cada vez que Mella arranque ou Soriano queira xirar, pode haber unha falta que interrompa o xogo.
O perigo para o Sanse: lembras que o filial da Real é o que máis faltas fai da liga? Pois con Muresan, iso é xogar con lume. Como se poña exquisito, o Sanse pode acabar o partido con máis amarelas que un campo de xirasoles.
As bandas e o cuarto oficial
Nas bandas estarán Bordoy Homar e Moleón Cuenca. Van ter que ter a vista de lince, porque coa velocidade de Ochieng por un lado e Mella polo outro, os fóra de xogo van ser milimétricos. E ollo con Gordillo Escamilla (o cuarto oficial): se Hidalgo se pon moi "enérxico" no banquiño protestando polas faltas do Sanse, este é o que lle vai dar o aviso ao xefe.
Como cuarto oficial actuará Juan Gordillo Escamilla, figura clave se o partido se quenta nos bancos, algo que non sería ningunha sorpresa tendo en conta o que hai en xogo e o carácter de ambos equipos.
O VAR, esa presenza silenciosa
No VAR estará David Gálvez Rascón, acompañado por Manuel Jesús Orellana Cid. A súa intervención pode ser determinante nun encontro con poucos goles, onde unha man, un penalti ou unha acción gris na área pode cambiar toda a lectura do partido.
O Dépor xa sabe o que é vivir encontros decididos por detalles mínimos, así que non sería mala idea que o equipo sexa especialmente coidadoso nas áreas. Porque se o VAR entra, entra para quedar.
Non parece un equipo arbitral dado ao “deixar xogar” alegremente. Máis ben todo o contrario. Iso pode penalizar a un Dépor que busca ritmo, pero tamén pode xogar ao seu favor se consegue que o partido se volva trabado e mental.
Onde ver o partido
Tes o partido aí mesmo, neno! Ás 14:00 horas arranca a batalla en Zubieta. Se non queres perder detalle de se Mella lle fai o "traxe" a Garro ou se o árbitro Muresan se pon a repartir tarxetas coma se fosen panfletos, aquí tes onde sintonizar:
Para VER (Na tele ou no móbil)
TVG2 (A Galega): A opción de sempre, de balde e en aberto para toda Galicia. Narración con ADN noso.
LaLiga TV Hypermotion: Se tes algunha plataforma de pago (Movistar, Orange, DAZN, Amazon Prime Video), podes velo no canal oficial da categoría.
GolPlay: Ollo á programación, que ás veces conectan se o partido se pon interesante, pero a mellor opción oficial é a Galega ou o canal da Liga.
Para ESCOITAR (A radio, que lle dá máis emoción)
Se es dos que prefiren o vermú co transistor (ou o móbil co cascos), estas son as frecuencias clásicas:
Radio Galega (Galicia en Goles): Conexións constantes e toda a emoción do carrusel.
Radio Coruña (Cadena SER): Coa voz de Adrián Candal e todo o equipo. Podes escoitalo no 93.4 FM ou na súa web/App e velos en Youtube.
Cope Coruña: No 99.9 FM, con Leti Chao e Carlos Alberto Sánchez.
Radio Marca Coruña: No 92.6 FM ou pola súa aplicación.
Para LER (Minuto a minuto e análise)
Se estás nun sitio onde non podes facer moito ruído, estas son as mellores webs para seguilo en directo:
La Voz de Galicia / Torre de Maratón: Fan un "minuto a minuto" moi completo con comentarios en directo de todo o que pasa.
Riazor.org: O portal de referencia para o deportivismo, con información ao segundo e o "post-partido" máis rabuñento.
Dxt Campeón: O diario deportivo da cidade tamén terá cobertura especial online.
No hay comentarios:
Publicar un comentario
Tú Koruño o simpatizante de Koruña City cuál es tu opinión???