Aitana triunfou en Koruña, pero o Coliseum volveu suspender: cando o calor acaba sendo o protagonista do concerto

 Hai concertos dos que un sae falando da posta en escena, das cancións ou da conexión do artista co público. E hai outros nos que, por desgraza, unha parte importante da conversa remata xirando arredor dun problema que leva máis de trinta anos sen solución. Iso foi o que ocorreu esta semana co concerto de Aitana no Coliseum de Koruña.

A cantante catalá conquistou o 22 de xullo un recinto ateigado, converteu a pista nunha enorme pista de baile e regalou un espectáculo á altura da súa condición de gran estrela do pop español. Pero, ao mesmo tempo, o concerto volveu sacar á luz unha das grandes eivas das infraestruturas municipais: a ausencia dun sistema de climatización moderno capaz de facer soportable un recinto pechado no verán... e tamén no inverno.

Un concerto espectacular... dentro dunha sauna

O Coliseum presentaba un cheo absoluto. Miles de persoas pagaran entre 60 e 140 euros para ver o único concerto de Aitana en Galicia. O ambiente era extraordinario, a produción espectacular e o público respondeu desde o primeiro minuto convertendo cada canción nun karaoke colectivo.

Pero houbo un protagonista inesperado.  A calor. Unha calor abafante que non só sufriu o público, senón tamén a propia artista. En pleno concerto, Aitana tivo que pedir que lle achegasen un ventilador ao escenario. A súa frase resume perfectamente o que se estaba vivindo no interior do recinto:

"É a primeira vez en toda a xira que teño que usar un ventilador. Que calor fai aquí!"

Non era unha broma nin un comentario anecdótico. Era unha evidencia.

Aitana acalaorada no concerto do Coliseum

Se ata a artista pasa calor...

Quen estaba na pista sabe perfectamente do que falamos. Abanos movéndose durante todo o concerto. Botellas de auga baleirándose a toda velocidade. Filas constantes nas barras. E mesmo momentos nos que chegou a esgotarse a auga nalgunhas delas pola enorme demanda. 

Aitana tamén tivo que pedir auga varias veces para ela e para os seus bailaríns. Non parece precisamente a imaxe que debería ofrecer unha cidade que aspira a traer os grandes espectáculos nacionais e internacionais.

Un problema que non é novo

O curioso é que nada disto sorprendeu aos asistentes habituais. Porque o Coliseum leva décadas funcionando exactamente igual. No verán convértese nun forno. No inverno, nun frigorífico.

Non existe un sistema de climatización que manteña unha temperatura confortable independentemente da estación do ano.

A ventilación continúa dependendo, en boa medida, da apertura das portas do recinto, unha solución claramente insuficiente cando hai máis de dez mil persoas no seu interior. E o problema non afecta unicamente aos concertos.

O Palacio dos Deportes sofre o mesmo mal

Os afeccionados ao deporte coñéceno perfectamente. No Palacio dos Deportes de Riazor tamén é habitual asistir aos partidos con abrigo durante os meses de inverno, mentres que nas citas multitudinarias do verán a sensación térmica tamén resulta excesiva, e un invernadeiro.

Son dous dos grandes recintos cubertos de Koruña, pero ambos arrastran unha carencia impropia dunha cidade que presume, con razón, de ser unha referencia cultural e deportiva do noroeste peninsular.

Koruña xa xoga na liga dos grandes concertos...

Nos últimos anos, Koruña conseguiu situarse no mapa das grandes xiras nacionais. Artistas internacionais e as principais figuras do panorama español inclúen xa a cidade nos seus calendarios.

Iso é unha excelente noticia. Pero tamén obriga a ofrecer instalacións á altura. Porque unha experiencia musical non depende só do artista. Depende tamén da comodidade do espectador. É difícil gozar plenamente dun concerto cando pasas dúas horas completamente empapado en suor.

O problema vai máis alá do aire acondicionado

A climatización é seguramente a deficiencia máis evidente, pero non é a única.

O Coliseum continúa arrastrando outras limitacións coñecidas desde hai anos:

• accesos pouco funcionais nas grandes citas;
• baños claramente insuficientes para eventos multitudinarios;
• dificultades para acceder directamente á pista segundo a configuración do espectáculo;
• zonas de restauración que colapsan con facilidade.

Son detalles que, sumados, empeoran unha experiencia pola que moitos espectadores pagan entradas que superan con facilidade os cen euros.

Aitana puxo o dedo na chaga

Quizais o máis significativo do sucedido o mércores é que quen verbalizou o problema non foi un espectador. Foi a propia artista.

Nunha xira que percorre os principais recintos do país, Aitana recoñeceu que era o concerto no que máis calor pasara. E iso debería facer reflexionar.

Porque se unha cantante acostumada a actuar diante de miles de persoas necesita un ventilador improvisado en pleno escenario, probablemente o problema non sexa puntual.

Unha reforma que xa non debería esperar

O Coliseum leva máis de tres décadas sendo unha das grandes infraestruturas de Koruña. Por el pasaron concertos históricos, eventos deportivos, espectáculos internacionais e miles de persoas que gardan grandes recordos entre as súas paredes. O mesmo pasa co Pazo dos Deporte que ten mais de 5 décadas. 

Precisamente por iso merecen unha actualización profunda. Non se trata dun luxo, trátase de ofrecer unhas condicións mínimas de confort tanto para o público como para os artistas ou deportistas.

Porque se Koruña quere seguir competindo coas grandes cidades na captación de concertos e grandes eventos, non pode permitirse que, ao rematar unha actuación inesquecible de Aitana, a pregunta máis repetida entre os asistentes non sexa "que concerto máis bo", senón "como puidemos aguantar tanta calor?"