Regina chega a Koruña: mar bravo e alerta laranxa no litoral

 O tempo volveu torcerse en Koruña e todo indica que aínda ten ganas de dar guerra un pouco máis. Tras o regreso da chuvia este xoves, a cidade afronta hoxe venres a chegada dunha nova borrasca atlántica: Borrasca Regina, a décimo sétima con nome propio desta tempada.

E non chega precisamente de visita tranquila. Segundo a previsión de MeteoGalicia, o temporal traerá mar moi axitada ao litoral coruñés, con ondas que poderán alcanzar ou mesmo superar os cinco metros de altura. Por este motivo activouse a alerta laranxa na costa, nun escenario que deixa un venres de vento, ceos cubertos e mar bravo.

Predicción para el resto de la semana:

Hoy: lluvias persistentes con acumulaciones importantes en Baleares y extremo este y noroeste peninsular ocasionalmente con tormenta.

Viernes: lluvia en península, Baleares y Ceuta; de nieve a 1000-1200 m en el oeste peninsular.

(1/2) pic.twitter.com/GhhNjSq1db

— AEMET (@AEMET_Esp) March 5, 2026

A situación chega apenas un día despois de que a cidade estivese xa baixo avisos amarelos por chuvia, vento e ondada. As precipitacións comezaron a caer durante a tarde do mércores e prolongáronse ao longo do xoves, preparando o terreo para este novo capítulo do inverno atlántico.

Un inverno cheo de borrascas con nome

Con Regina, a tempada de temporais 2025-2026 segue engadindo nomes a unha lista que xa vai longa: Alice, Benjamin, Claudia, Davide, Emilia, Francis, Goretti, Harry, Ingrid, Joseph, Kristin, Leonardo, Marta, Nils, Oriana e Pedro xa pasaron polo calendario meteorolóxico deste inverno.

No listado oficial quedan aínda catro nomes por estrear: Samuel, Therese, Vitor e Wilma. Se tamén se esgotasen, os servizos meteorolóxicos europeos teñen preparada unha segunda lista de reserva, aínda sen facer pública.

De feito, o número de borrascas desta tempada xa supera ao do inverno 2023-2024, cando tamén se chegou practicamente ao final da lista oficial. Daquela, a última en recibir nome foi Renata, xa ben entrado o mes de abril.

Venres de mar bravo

Mentres tanto, en Koruña o panorama inmediato é bastante claro: mar revolto, vento e ceos pechados. Nada demasiado sorprendente para unha cidade que leva o Atlántico pegado á porta.

Porque aquí, cando o inverno parece que vai marchar… sempre aparece outra borrasca dicindo que aínda lle queda unha última rolda.